Terms & Conditions

Ye Terms & Conditions MedicoBharat ke istemaal par laagu hoti hain. Is website ka upyog karke ya koi booking karke aap in shartein, laagu kanoonon aur is platform ki policies se sahmat hote hain. Aap in shartein se sahmat nahi hain to kripya service ka upyog na karein.

MedicoBharat ek lab test booking aur home sample collection service hai. Hum aapke diye gaye pate par ek trained phlebotomist bhejte hain jo aapka blood ya urine sample collect karta hai, use laboratory tak pahunchate hain, aur report aapko PDF ke roop me bhejte hain. MedicoBharat koi medical diagnosis, ilaaj, prescription ya doctor ki consultation nahi deta.

Booking 18 saal ya usse zyada umar ka vyakti hi kar sakta hai. Kisi bachche ka ya aise vyakti ka test book karte samay jo khud sahmati dene ki sthiti me nahi hai, aap ye pushti karte hain ki aapke paas uski or se sahmati dene ka adhikaar hai. Sample lete waqt kisi vayask ka maujood rehna zaroori hai.

Form bharne ka matlab confirm slot nahi hota. Hum aapse call kar ke slot aur pata confirm karte hain, uske baad hi booking pakki maani jaati hai. Sahi pata, landmark aur chalu mobile number dena aapki zimmedari hai — der se pahunchne ki sabse aam wajah adhoora pata hoti hai. Aapka ilaaka hamare service area se bahar nikla to hum booking se pehle hi saaf bata denge.

Zyadatar routine test aur health package bina prescription ke book kiye ja sakte hain. Kuch specialised test niyam ke anusaar valid prescription maangte hain, aur uske bina wo test nahi kiya ja sakta. Aap jo test chunte hain uski zimmedari aapki hai; doctor ne kuch likha hai to uska photo booking ke waqt dijiye taaki wahi panel liya jaaye — test ke naam aksar milte-julte hote hain.

Sample aapke saamne liya jaata hai aur poori visit lagbhag 10 minute ki hoti hai. Kabhi-kabhi technical wajahon se dobara sample lena padta hai — sample clot ho jaana, tube sahi level tak na bharna, haemolysis, ya fasting ka niyam poora na hona. Aise maamlon me dobara collection ka koi alag charge nahi lagta, lekin report me utni der lag jaati hai. Fasting wale test me nirdharit samay tak kuch na khana aapki zimmedari hai; galat taiyaari par liya gaya sample galat result de sakta hai.

Har test ka price is website par likha hai aur home sample collection uske upar free hai — koi visiting charge ya chhupa shulk nahi. Payment sample collection ke waqt hota hai, cash ya UPI se. Jin test par "Call for price" likha hai unka price sample lene se pehle bata diya jaata hai. Price kabhi-kabhi badal sakte hain; jo price booking confirm karte waqt bataya gaya, wahi laagu hoga.

Zyadatar routine test ki report 24 ghante ke andar taiyaar ho jaati hai aur WhatsApp tatha email par PDF me bheji jaati hai. Culture jaise kuch test 48 se 72 ghante lete hain, kyunki unme pehle organism ugana padta hai. Ye samay anumaan hai, guarantee nahi — sample ki quality, dobara test ki zaroorat ya technical dikkat se der ho sakti hai. Aisi sthiti me hum aapko batayenge.

Lab report koi diagnosis nahi hai. Report par 'high' ya 'low' ka flag sirf ye batata hai ki value chhapi hui reference range se bahar hai — iska matlab bimari nahi hota, aur thoda sa bahar hona bahut aam hai. Is website par di gayi saari jaankari sirf samanya shiksha ke liye hai aur kisi bhi soorat me doctor ki salah ka vikalp nahi hai. Koi bhi dawa shuru karna, band karna ya uska dose badalna sirf ek registered medical practitioner ki salah par hi kijiye.

Tez bukhar ke saath jhatke ya behoshi, gardan akadna, saans lene me takleef, seene me dard, lagatar ulti, ya bahut zyada kamzori — in sthitiyon me lab test book mat kijiye, seedha najdeeki hospital jaaiye. MedicoBharat ambulance, emergency care ya 24 ghante ki medical sahayata nahi deta, aur home visit ke slot subah 6 baje se shaam tak hi hote hain.

Booking confirm hone ke baad bhi aap phlebotomist ke aane se pehle kabhi bhi call kar ke cancel ya reschedule kar sakte hain — koi charge nahi lagta, kyunki payment collection ke waqt hi hota hai. Hamari taraf se bhi booking cancel ya reschedule ho sakti hai — mausam, staff ki uplabdhta, ya aapka pata service area se bahar nikalne par. Aisi har sthiti me hum aapko call kar ke batayenge.

Sahi naam, mobile number aur pata dena; fasting wale test me nirdharit samay tak khaali pet rehna; jo dawaiyan aap le rahe hain unke baare me phlebotomist ko batana; ghar me koi bujurg, bistar par pada vyakti, ya operation ke baad recovery kar raha vyakti ho to booking ke waqt ye jaankari dena; aur collection ke waqt payment poora karna.

Service sirf un sheher aur ilaakon me uplabdh hai jo is website par listed hain, aur ye list badal sakti hai. Ho sakta hai kuch test har jagah, har din uplabdh na hon — aisa hone par hum booking se pehle bata denge. Hum kisi bhi aise ilaake me service ka vaada nahi karte jahan hum sach me pahunch nahi sakte.

Kanoon dwara anumat adhiktam seema tak, MedicoBharat kisi bhi apratyaksh nuksan, report me der, dobara sample ki zaroorat, ya customer dwara report ki apni vyakhya ke aadhaar par liye gaye kisi bhi nirnay ke liye zimmedar nahi hoga. Kisi bhi sthiti me hamari kul zimmedari us booking ke liye aapke dwara di gayi rakam se adhik nahi hogi.

Ye shartein samay-samay par badli ja sakti hain. Badlav is page par publish hote hi laagu ho jaate hain, isliye booking se pehle ise ek baar dekh lena uchit rehta hai.